Monday, April 25, 2016

MEETING PA MORE!

Panapanahon lang.

Noong araw, ang simpleng pangarap ko ay makasakay ng eroplano.

Natupad naman kaya nag-level up na sana ay matatakan naman ang passport na nag-expire nang hindi man lamang nagamit.

Naganap din 'yan kaya nag-one up ulit na madikitan naman sana ng visa ang passport.

Ngayon ay tadtad na ng visa ang passport ko.

Isang kontinente na lang, puwera ang Antartica, at naikot ko na ang mundo.

Pero parang ngayon ay mas gusto ko pang magbisikleta at magluto ng hapunan kesa magbiyahe.

Nitong nakaraang buwan ay nakahanap ako ng mga matitibay na dahilan para hindi makadalo sa dalawang pagpupulong na ikinasa sa Bangkok.

At lihim akong nagalak na hindi natuloy ang South-South Conference sa Phnom Penh, na nakalimutan akong muling ayain ni Derk na sumama sa papulong niya sa Addis Ababa.

Kaya siguro ako pinarusahan ng sangkatutak na mga pagpupulong.

N'ung Miyerkules, apat na nakakabalinguyngoy na pulong ang nagtapos sa plenaryo ng mga pantas.



N'ung Huwebes, hindi mabilang na mga maliliit na pulong ang isinagawa ng mga operador sa mga iskinita ng isang malawakang diskusyon tungkol sa El Nino.


At n'ung Biyernes, natunaw ang mga kendi sa masidhing kuwentuhan na naganap papuntang Tagaytay, habang nasa Tagaytay, at pauwi mula Tagaytay.


Pagdating ko ng bahay n'ung Sabado ay nagtawag ng pulong ang nag-iisang sinusunod naming lahat para pag-usapan ang pag-uwi ni Bulan mula Iloilo sa katapusan ng Mayo, at kung papaano gugugulin ni Balong ang apat na buwan niyang bakasyon.

Kaya n'ung Linggo ng maagang maaga ay tahimik kaming nagbisikleta ni Balong, hindi dahil inaantok pa kami, kundi dahil hindi ko mawari kung papaano ko babakahin ang nakaambang dalawang malawakang pagpupulong na ang pamagat ay nag-uumpisa sa "Annual" at "Grand", habang tinutuklas namin ang mga nakatagong kalsada sa pagitan ng Maligaya at Baloc.

Monday, April 18, 2016

THE AGE OF TAURUS

The Bull grew up not talking much and mostly keeping to himself. 

He is not into playing and going out with friends.


His academic medal count stopped at the fourth grade and he's in middle of his class academic standing at best.


But there's that streak in him that spells SUTIL, and it tells of expecting the unexpected to happen.


Great unexpected things, like passing the tough CLSU Science High School entrance exam.



For it is written in the stars that he will work more than talk; that he will be cynical and dominant yet distant and secretive.

The Bull is an analytical thinker who will thrive on diversity.

He was born to enjoy living and can therefore take life's pain.

It is therefore in honor of his coming of age that a forbidden feast was prepared.


And in salute of his impressive feat, the 373 Bikers and Team SCOM rode together through the hills and dry river beds of Lupao.


The Bull has arrived and he is his father's son.

Monday, April 11, 2016

ANG PAGPAPARANGAL SA REYNA NG MGA KULITIS

Gawa sa mga pinong hibla ng bughaw na sapiro ang kanyang pang-umagang terno, dagat at langit, minina sa kaibuturan ng Divisoria, sinamahan ng ipinuslit na ilang pirasong beryl, apoy at dugo, para sa panghapong terno, pambihis sa dugong hindi na nga bughaw ay namumutla pang pula.


Ang kanyang korona ay pinanday ng mga artisano ng Meycauayan, tadtad ng mga brilyanteng nabibili kada kilo at pinalamutian ng mga binasag na esmeralda at matrine, bagay na bagay sa kanyang tig-sampung libong sutlang kapa na singtanda ng panganay ng umaga.


At ang kanyang espada, simbolo ng mga kabalyero at kagalantihan, ng ranggo at kapangyarihan ng mga kadete, baston ng mga alagad ng tetano bilang paalala sa mga sutil kung ano ang mangyayari sa kanila kung sila ay magalusan nito.    


Ako ang abay ng Reyna ng mga Kulitis, tagabitbit ng kanyang korona at espada, tagalista ng kanyang mga atas, kutsero ng kanyang karwahe, at tagasalo sa mga palasong ipupukol sa kanya. 


Sa akin din niya ilalagak ang mga handog na palumpon ng mga bulaklak lalo na ang mga puting rosas na hindi natanggalan ng tinik.


Ako ang Punong Tanod ng mga Kabalyero ng Kahariaan ng Kulitis, silang mga Mandirigma ng Bughaw na Brigada at mga Magigiting na Kantero ng Lohiya 373. 


Kinabukasan pagkatapos ng Seremonya ng Pagpaparangal, ipinasyal ng Abay ang Prinsipe ng mga Kulitis. Sumakay sila sa kanilang mga kabayo at tinahak ang tagong kalsada, hinabol ng mga aso, hanggang sa marating nila kung saan nililok si Al Dub sa isang pinitak ng palay.

Mabuhay ang Reyna ng mga Kulitis!


AMARANTH: cultivated as leaf vegetable, pseudo-cereals, and ornamental plants (Wikipedia)

SCIENTIFIC NAME: Amaranthus spinosis L.

COMMON NAME: kulitis

Monday, April 04, 2016

APRIL FOOL

Bigla,

kumabyos ang mga kalso at sumadsad paurong ang nangakong hindi na maglululong, nadulas sa libreng beer na ipinaminindal sa mga panauhing de kurbata, natapilok sa litsong baboy at tupa na inihandog kay Kuya Val, bumigay sa pulutang inihaw na liempo para sa pagdalaw ni Kuya Cris, at tuluyang tinangay ng mabilis na pagbati at pamamaalam ni Bakulaw na papauwi sa Macau.



'Yan na marahil ang masamang epekto ng iniwanan sa SM City at nagpalaboylaboy sa Trinoma, ng nakatunganga sa Centris at ang panghimagas na halohalo sa ulam na sisig, at ng pagtawid sa tulay na bumabagtas sa rumaragasang ilog ng mga kalsada at sasakyan.


Maari,

sanhi din ito ng pagdiriwang ng mga nakatapos ng isang yugto sa eskuwela, katulad ni Balong na nakapag-uwi naman ng isang gintong medalya, o kaya ang crush niya na humakot ng sangkaterbang pagkilala, o ng nabiting bakasyon ni Bulan na nasa Iloilo na, at ng marami pang ibang dahilan na hindi na maalala at mawari.




Ang mga panauhing de kurbata, ang pagkakalukluk ni Kuya Val, ang pagdalaw ni Kuya Cris, ang pagdating ng bakulaw, ang pagtatapos ni Balong sa elementarya at pinakamabilis niyang pagbibisikleta...


Alin man sa mga ito ang maaaring nagtanggal sa kalso ng pagtitimpi na naganap sa buntot ng huling linggo ng Marso at unang mga araw ng Abril kung saan napaglaruan ang mga tatangatanga.

At ngayon ngang buwan ng Abril, may isang luko-luko na kumikirot ang apdo at nagkakandirit sa Panay Avenue.