Monday, July 30, 2018

PANGHIMAGAS SA ADOBONG STRATEGY PAPER NA IGINISA SA CONCEPT NOTE AT PINIGAAN NG GATA NG DISCUSSION PAPER

Malupit sina Inday at Josie, at mabangis ang iniwan nilang ika-apat na linggo ng Hulyo. 

Ano ang mauunang ititipa --- ang strategy paper, ang concept note o ang mga case study ng isang discussion paper?

Naging malalim ang hugot sa pagtimpla ng mga pangungusap at sa pagsangkutsa ng paksiw upang maging nilaga habang pinakukuluan ang isang wataw na sanaysay hanggang sa maging isang mangkok na lamang.

Hindi kinaya ng dalawang araw na pagbibisikleta ang pagbubuhol sa mga salita kaya kumirot ang balikat sa pagkakaluklok ni GMA at ang napipintong muling pagkabigo ni Narion Quintana. 

Nakakaumay ang nagmamantikang adobo... 




Kaya pansamantala ay iniwan ko muna ang kusina para hanapin ang musa sa mga katha ng magiting na si Amorsolo dahil ang sarap ng adobo ay kikintal isang araw matapos itong lutuin. 



Adobo kaya ang ulam ni Juan Luna noong iginuguhit niya nga kanyang mga obra maestra?

Si Felix Hidalgo na ipinanganak sa Binondo ay pinalaki sa comida de china kaya siguro second place siya palagi kay Juan Luna. 



Marahil ay nag-ulam din ng adobo sina Guillermo Tolentino at ang umano'y modelo niyang si FPJ Sr. habang nililok ang UP Oblation.


Sa mga obra naman nina Vicente Manansala at Botong Francisco maaaninag ang pagkalas sa realidad patungo sa mala-Picasso na paglikha, adobo fusion kumbaga, samantalang ang kay Jose Joya naman ay mahirap lunukin, binansagang adodo pero siya nga ba o tae ng alien na ipinahid sa pader?




Nakakatanggal umay ang pansamantalang paglukob sa anino ng mga Maestro at Henyo na para bagang minatamis na saging sa dulo ng masaganang handaan.

At sa Binondo kung saan hindi uso ang adobo ay nahahasa ang panlasa sa mga bagong tuklas na pagkain katulad ng homang, hakao, tostadong palaka at bihon guisado na ga-palad ang sahog.


Sa wakas ay natunton ko din ang Ling Nam at ang pamoso nilang beef asado wanton mami na ayon sa aking may bahay ay lasang pares (adobong baka?).


Sa mga panahon na wala nang gata na mapiga, mas mainam isipin na ang mundo ay napapalamutian ng mga panghimagas, na ang mga strategy paper, concept note at mga case study ay pawang mga guni-guni lamang na walang puwang sa aming padespedida kay Bulan.


Walang bentang adobo sa SIDCOR Sunday Market...


...dahil lahat ng adobo sa mundo ay iniwan ko sa Bakal 2, mga concept note at case study na ibinalibag sa internet noon pang Biyernes, mga kaibigang babalikan at naghihintay sa piging ni Mr. Martin, at strategy paper na malapit nang mainin.

Ang lapot sa aking adobo ay katas ng nalusaw utak, at pasintabi sa mga Iglesia na ang ginamit na pampakulay ay hindi toyo kundi dugo mula sa mga pumutok na ugat...

Monday, July 23, 2018

ISANG LINGGONG WALANG JUICE

Martes ng hapon nagparamdam si Inday matapos ang bigo naming pagsalakay ni Bulan sa mamihan at shabu-shabuhan ni Kuya Rhommel sa may papuntang Sapang Kawayan.

Pinagbigyan niya munang kuryentehin ako ni Cathy bago siya dumating na parang istambay na dumayo sa inuman kahit hindi inanyayahan, at hindi aalis sa kabila ng mga pasaring hanggat hindi nauubos ang pulutan.  



At sa loob ng tatlong araw ay hindi siya lumubay hanggang sa lumubog ang Quezon at Licab, at nagmistulang dagat ang mga bukid sa kabilang bahagi ng kalsada sa Baloc.

"Juice ko!" ang tangi ko naibulalas sa mga nawalang araw ng pagbibisikleta na sa totoo'y palihim na pasasalamat dahil hindi nakapasok si Jowa kaya sabay naming isinaing and kanyang first quarter report at ang aking mga case study. 

Heto na nga yata ang siyam-siyam, ang pansamantalang pagkaidlip ng Diyos, kaya ako nasabuyan ng maduming tubig baha n'ung Biyernes ng hapon bago ko nakuha ang sapin-sapin at naisuot ang barong tagalog nang mabilis na umoberteyk sa kanan ang walang modong pick-up.

Tuluyang napasok ng ulan ang loob ng Lohiya n'ung Sabado ng umaga kaya kumuha ng videoke si Kuya Paeng para kantahan ng pasyon at alayan ng juice ang masamang panahon, na hindi yata tumalab dahil binangga ng mga lasing ang Innova ni Kuya Rene habang tahimik na nakaparada sa gilid ng kalsada at kami'y nagpapakulo ng shabu-shabu pagkatapos ng pulong ni Kuya Jun.  




Linggo, bahagyang tumila ang delubyo, kaya kami nagpasyang mananghali ng steak sa Cabanatuan na pakiwari namin pagkatapos ay para kaming naswitik sa kapirasong makunat na karne at malabnaw na juice kaya bumili pa ako ng dalawang litro ng Johnny Walker Black bilang panangga kay Inday na bumalik kinahapunan at binuhusan ng ulan ang naglalagablab naming inuman sa bowlingan.  


Monday, July 16, 2018

HAI[na]Ku 22 & 23

-22-

a ride for a beer
two rides for a Double Black
long table for four



-23-

wet summer class gone 
Rizal lives in Banahaw
shoulder unfreezing

Monday, July 09, 2018

HAI[na]KU 20 & 21

-20-

TPLEX is too far
Colombia and Russia fell
Lady in red waits


-21-

Ceviche for lunch
King Solomon's House shaken
Insulin Sunday 


Monday, July 02, 2018

HOPIA, PALAKA AT PORK CHOP

kabibi, morcon at salmon ang terno sa maasim na chardonnay bagamat napatunayan namin nung Biyernes na puede ring ipilit ang maanghang na mami, magalas na cold cuts at tuyot na litson

hindi lang ako sigurado kung babagay din dito ang pares na maaaring maitanong sa magiliw kong therapist na ang kamangmangan sa deep tissue massage ay napagtatakpan ng amoy ng kanyang pawis 

 

ang alak ay pampagana na para bagang "GLP muna bago Binondo" kung saan kami nagtalo alin ang best hopya ng pinakamatandang Chinatown: ang ube ng Eng Bee Tin o ang monggo sa Po Chuan Tin  


mula Salazar ay lumundag kami pa-Estero para panoorin kung papaano binabalatan ang mga palaka bago ito katayin, pagulungin sa rekado at iprito ng tustado na buong galak na dinapurak ng gutom nang si Bulan  



at bilang panghimagas ay kumabila kami sa Norberto Ty para lasahan kung ang pamosong pork chop ng Tasty Dumplings ay katono ng chardonnay na halos kaparehas sa lasa ng iginayak na sawsawan kaya masasabing puede na rin marahil...